Vawiin a Sorkar thuchhuahin a tarlan danin, he hunah hian Abhijit Sinha, Jt. Secretary (CTRC), Ministry of Home Affairs, Jintu Das, Director, Department of Agriculture, Rajveer Singh, SE, Ministry of Jal Shakti, Mahesh Kumar, Deputy Director (FCD), Adelbert Susngi, Regional Officer, MoRTH leh Moti Ram, Asst. Commissioner (NSAP)- te an tel a. Chhiatna thlenna hmun hrang hrang endikna ah hian Er. Lalrothanga, E-in-C, Public Health Engineering Department leh PHE Department hotu dangte an tel a, Er. H. Zoramliana, CE (Highways), PWD, DM&R leh I&PR-a thawktuten an telpui bawk a ni.

Inter-Ministerial Central Team-ten Greater Aizawl Water Supply Scheme Phase I & II an tlawhna ah hian May ni 27 leh ni 28, 2024-a tui lianin khawl leh bungrua nasa taka a tihchhiat avangin Phase I chu hnathawh nan a hman theih rih loh thu tarlan a ni a. Phase II hmang a chawm mek niin nidang a 40 MLD bawr vel pek chhuah thin chu khawl chhiat vang leh tui nasa taka a nut thin avangin tun dinhmun ah 10 – 15 MLD vel chauh pek chhuah theih a nih rih thu an sawi. 

SIPMIU 37 MLDB Pump House, Setlak, Tanhril pawh tui lian avangin tui lak luhna, Vertical Turbine Pump a chhiat thu sawi niin hna thawh theih a nih rih loh thu thawktute chuan an sawi a. Tui avanga mipuiin harsatna lian zawk an tawh loh nan rang taka hmalak a tul thu tarlan a ni.

Zoram Medical College, Boys leh Girls Hostel hnaih a leimin chu a hmun ah an endik a. Leimin vang a Aibawk leh Hlimen a chhiattawkte chu IMCT-te hian kawmna hun nei bawkin Cyclone Remal avanga loneitu harsatna tawkte an kawm bawk a ni.

 Aizawl – Muallungthu – Khumtung leh Aibawk – Darlung inkar kawng a leimin leh leimin hlauhawmna hmun te pawh vawiin hian endik nghal a ni a. IMCT-te hian naktuk hian Serchhip leh Saitual a chhiatna thleng hrang hrangte a hmun ah an endik chhunzawm dawn a ni.